Министерот за правда Бојан Маричиќ денеска учествуваше на ЕУ – Западен Балкан министерскиот форум за правда и внатрешни работи, во организација на германското претседателство со Советот на ЕУ кој се одржа онлајн.

Во своето обраќање, како што соопшти Министерството за правда, Маричиќ истакнал дека поради пандемијата со Ковид – 19, потребата за забрзана дигитализација на правосудниот систем е значајна како никогаш досега, како за реформите во правосудството, така и за ефикасното постапување по случаите од страна на судските институции.

Без никакви одложувања, Владата донесе Уредба со законска сила за роковите во судските постапки за периодот на вонредната состојба. Со оваа Уредба, се запреа роковите за поднесување тужби во парнична постапка, кривични постапки и управни спорови, како и роковите за поднесување редовни и вонредни правни лекови за време на вонредната состојба, потенцирал Маричиќ.

Воедно, образложил дека за заштитата на судиите и странките во постапката, Судскиот совет постапил навремено со донесувањето на Одлуката за работата на судовите во услови на пандемија. Со одлуката е утврдено кои случаи ќе се сметаат за итни и приоритетни за постапување, како и начинот на заштита при влегување во судот, дезинфекција на судот и друго. Случаите што не биле итни, се воделе единствено доколку немало ризик по здравјето на кој било од учесниците во постапката.

За прв пат во Македонија онлајн судењето беше спроведено од страна на судот во Кавадарци. Ова го сметаме за позитивен исход и пример што дополнително ќе поттикне употреба на дигитални алатки како современ начин на комуникација помеѓу судовите и странките, истакнал Маричиќ, кој навел и други позитивни примери со кои се покажало дека системот е применлив за сите видови кривични постапки со целосна гаранција од секаков вид на злоупотреба.

Со цел да се надминат идентификуваните слабости, Маричиќ нагласил дека ќе биде многу важно во претстојниот период да се зајакне правната рамка во врска со електронското водење на судските постапки.

За соодветно и непречено функционирање на правосудството за време на пандемија или слични ситуации, Маричиќ подвлекол дека е потребна целосна дигитализација на случаите и интероперабилност помеѓу судовите, со што значително ќе се зголеми ефикасноста на судовите и ќе ги забрза судските постапки од една страна, а ќе ја намали потребата за физичко присуство од друга страна.

На форумот, покрај министрите, учествуваа и еврокомесарите за проширување, правда и внатрешни работи, Оливер Вархеји, Дидие Ренедерс и Илва Јохансон. Со него претседаваше германската министерка за правда Кристина Ламбрехт.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.