Пријателските односи меѓу Република Македонија и Република Албанија продолжуваат да се зацврстуваат со реализација на проекти од заеднички интерес, со посебна гордост информира владината прес-служба.

Најновиот резултат од пријателските односи меѓу двете држави е одлуката за реконструкција на заедничкото, основно и средно училиште во Пустец, која беше дел од заклучоците на заедничката седница на владите на двете земји во Поградец минатата година.

Оваа одлука дојде како резултат на претходната активност на премиерот Зоран Заев и министерот задолжен за дијаспората Едмонд Адеми, во иницијативата на Владата на Република Албанија за реконструкција на 33 основни и средни училишта во Албанија, да биде вклучено и заедничкото основно и средно училиште во Пустец, во кое наставата се изведува на македонски и на албански јазик.

Реновирањето на училиштето во Пустец, веќе подолг период беше барање на македонската заедница која живее во Пустец, а нејзиното реализирање уште еднаш ги потврдува одличните односи помеѓу двете држави, и потврдува дека Албанците во Македонија и Македонците во Албанија се мост за градење блиски односи, пишува во соопштението од Владата.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.