Заврши гласањето за парламентарните избори 2020 година. До 19 часот излегоа 830.370 граѓани со право на глас односно одѕивот беше 45,77 проценти.

Денеска во земјава право на глас имаат 1 814 263 гласачи кои можат да гласа на 3 480 избирачки места, за кандидатските листи на 15 коалиции и партии. Гласањето кое почна во седум часот, траеше 21 часот. За првпат во македонската историја се гласа паралелно со посебен протокол за заштита од новиот коронавирус.

Ова се и најдолгите избори во македонската историја, кои траат три дена. Вчера, на вториот ден од гласање своето избирачко право го искористија нешто под 10 000 гласачи, а право на глас имаа болните и немоќни (8.855 регистрирани гласачи), лицата во старските домови (357) и затворениците (1.657 запишани гласачи).

Завчера пак гласаа 723 заболени од Ковид-19 или лица во домашна изолација.

По затворањето на гласачките места записниците и другиот изборен материјал избирачките одбори го доставуваат до ОИК во рок од пет часа по завршувањето на гласањето.

Надлежната ОИК потоа ги сумира резултатите од гласањето, составува записници и ги предава на ДИК.

ДИК првичните резултати од гласањето добиени по електронски пат ги објавува сукцесивно, а резултатите од записниците од ОИК во рок од 12 часа по завршувањето на изборите.

ДИК конечните резултати од изборите ги објавува во рок од 24 часа од денот на нивната конечност.

Изборот на граѓаните беше:

1 – Демократска партија на Албанците – ДПА

2 – Политичка партија Демократи

3 – СДСМ и коалицијата „Можеме“

4 – Левица

5 – Алијанса за Албанците и Алтернатива

6 – Глас за Македонија

7 – Граѓанско демократска унија – ГДУ

8 – Интегра

9 – Демократската унија за интеграција – ДУИ

10 – Социјалдемократска унија – СДУ

11 – „Никогаш Северна, само Македонија“ – Единствена Македонија

12 – МОРО работничка партија

13 – Народна партија на Ромите

14 – ВМРО-ДПМНЕ и коалиција „За Обнова на Македонија“

15 – Твоја партија

Со свои кандидатски листи во сите шест изборни единици учествува ДУИ, коалицијата „Можеме“ предводена од СДСМ и БЕСА, коалицијата „Обнова на Македонија“ предводена од ВМРО-ДПМНЕ, политичката партија Интегра, „Никогаш северна, секогаш Македонија“, Демократи, Алијанса за Албанците и Алтернатива, Левица и Работничката партија.

СДУ, ГДУ и Глас за Македонија не учествуваат во „шестката“, односно поднесоа листи само за изборните единици 1, 2, 3, 4 и 5. „Твоја партија“ достави кандидатски листи за изборите единици 1, 2 и 5, а Народна партија на Ромите само во втората изборна единица. ДПА има кандидатски листи во пет изборни единици.

Носител на листата на СДСМ и коалицијата во првата изборна единица (ИЕ) е досегашниот министер за надворешни работи, Никола Димитров, техничкиот премиер Оливер Спасовски е во втората, генералниот секретар на партијата, Љупчо Николовски во третата, во изборната единица четири носител елидерот Зоран Заев, „петката“ ја предводи вицепремиерката и министерка за одбрана Радмила Шекеринска, а носител во шестата изборна единица е лидерот на БЕСА, Билал Касами.

Носител на листата на коалицијата предводена од ВМРО-ДПМНЕ во изборната единица 1 е професорката Гордана Силјановска, во „двојката“ е Владо Мисајловски, во „тројката“ е Игор Јанушев, во четвртата изборна единица е Александар Николоски, во петата изборна единица е оперскиот пејач Игор Дурловски и во шестата е Дафина Стојановска.

Претседателот на ДУИ, Али Ахмети е носител на кандидатската листа на партијата во шестата изборна единица, Талат Џафери во петтата изборна единица, во тројката носител е поранешниот министер за економија Беким Незири, во втората изборна единица министерот за образование Арбр Адеми и во првата изборна единица носител е партискиот потпретседател Изет Меџити.

Лидерот на Алијансата за Албанците Зијадин Села е носител на кандидатската листа на коалицијата со Алтернатива во шестата изборна единица, додека Африм Гаши од Алтернатива во втората изборна единица. Во првата изборна единица носител е Скендар Реџепи, во третата Беким Татеши, во четвртата Валбона Река, а во петата Сурија Рашити.

Носител на листата со кандидати за пратеници на ДПА во шестата изборна единица е лидерот на партијата, Мендух Тачи. Носител во првата изборна единица е Ниметула Демири, а во втората Орхан Ибрахими. Предводник на кандидатската листа во третата изборна единица е Сами Рушити, додека во четвртата изборна единица ДПА нема кандидати, а носител во петтата изборна единица е Васви Доко.

Носители на листата на Политичка партија Демократи се: Катерина Тодоровска во ИЕ 1, Христина Гаши во ИЕ 2, Жарко Кучишки во ИЕ 3, Никола Бујуклиев во ИЕ 4, Јорго Огненовски во ИЕ 5 и Изет Зејделовиќ во ИЕ 6.

Носители на „Левица“ се Димитар Апасиев во ИЕ 1, Реџеп Исмаил во ИЕ 2, Борислав Крмов во ИЕ 3, Бранко Ристов во ИЕ 4, Јована Мојсовска во ИЕ 5 и Сенада Ибраимова во ИЕ 6.

Носител на кандидатската листа на „Глас за Македонија“ во првата изборна единица е Солза Грчева, во втората е Адријана Богдановска Тоскиќ, во третата е Лидија Горачинова Илиева, во четвртата е Гоце Златев и во петата Наташа Котлар Трајкова.

Носители на листите на Граѓанско-демократска унија (ГДУ) се Ана Глигорова во ИЕ 1, Есед Јусуфовски во ИЕ 2, Петар Колев во ИЕ 3, Добре Митрев во ИЕ 4 и Даниел Јордановски во ИЕ 5.

Кандидатските листи на Интегра – Македонска конзервативна партија ги предводат Љупчо Ристовски во ИЕ 1, Александар Главинов во ИЕ 2, Сузана Чесмаџиска во ИЕ 3, Воислав Зафировски во ИЕ 4, Николче Талевски во ИЕ 5 и Виолета Србиновска во ИЕ 6.

Носител на СДУ во Првата изборна единица е Петар Богојески, во втората е Снежана Костадиноска Милошеска, во третата е Војо Беловски, во четвртата е Жарко Бошкоски и во петата е Стево Насковски.

„Никогаш Северна, само Македонија“ на овие избори ја предводат Биљана Чинго во ИЕ 1, Јове Кекеновски во ИЕ 2, Вангел Симев во ИЕ 3, Јанко Бачев во ИЕ 4, Ацо Николовски во ИЕ 5 и Љупчо Столевски во ИЕ 6.

Носители на листи на МОРО – Работничка партија во изборна единица 1 е Атанас Трајковски, во втората е Горан Зафировски, во третата е Светлана Здравковска, во четвртата е Киро Јовчевски, во петата е Жарко Гроздановски и во шестата е Иван Јанкуловски.

Народна партија на Ромите има листа во втората изборна единица, а носител е Ѓеѓе Демировски.

Носител на кандидатската листа на „Твоја партија“ во првата изборна единица е Мирјана Најческа, во втората е Ѓорѓе Марјановиќ и во петата е Илија Тодоровски.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.