Законот за двојазичност е штетен и ќе предизвика далекусежни последици по Република Македонијa, изјави на денешната прес-конференција портпаролот на ВМРО-ДПМНЕ, Игор Јанушев.

Дополнителен проблем е што законот е донесен на начинот на кој што се донесува е насилнички и недемократски. Доколку ваквото самоволие на власта реализирано преку поединци остане неказнето, огромен е ризикот преседанот во иднина да се претвори во правило, вели Јанушев.

Јанушев соопшти дека поради ова ВМРО ДПМНЕ денеска поднесува кривични пријави против лицата Талат Џафери, Неџбели Ибраими и Мартин Костовски, поради основано сомнение дека извршиле кривични дела „Злоупотреба на службената должност и овластување“ по член 353, „Злосторничко здружување“ по чл.394 и „Саботажа“ по чл.315 од КЗ.

Џафери, Ибраими и Костовски, свесно и со целосна умисла извршиле низа кривични дела при што ја злоупотребиле службената положба и овластување и го загрозиле уставниот поредок и безбедноста на државата. Истите на нечесен и подмолен начин, спротивно на уставот и законите овозможиле објавување на законот за двојазичност без потпис од Претседателот на Републиката, со што се воведува неуставна двојазичност, рече Јанушев.

Тој додаде дека власта, иако свесна дека врши противправно дејствие и дека законот за двојазичност е неуставен, факт кој беше нотиран и од Претседателот на државата, но и од страна на многубројни еминентни правници одлучи да продолжи насилнички и незаконски.

Законот за двојазичност во Службен весник е пратен само со потпис на Талат Џафери, што е правен преседан и целосно безаконие, бидејќи уставот стриктно пропишува дека указ за прогласување на закон не може да биде спроведен без потпис на претседателот на Република Македонија. Џафери не можел и не смеел да го испрати законот за објавување, а Ибраими, во својство на техничка служба немал никакво овластување да потпише. Костовски е одговорен бидејќи не смеел да објави указ за прогласување на закон без потпис на Претседателот.

Џафери, Ибраими и Костовски извршиле свесно загрозување на уставниот поредок бидејќи јасно е пропишана процедурата за прогласување на законот. Пријавените, свесно спротивно на Уставот на Република Македонија, со прогласувањето и стапувањето на силата на Законот за употреба на јазиците, воведуваат двојазничност на цела територија на Република Македонија, со што го рушат Уставниот поредок на државата, изјави Јанушев.

Тој го повика Јавното обвинителство да се ослободи од политичките притисоци и веднаш да постапи по оваа кривична пријави за да се елиминираат штетите по државата нанесени од страна токму на Џафери, Ибраими и Костовски.

Во моментов во процес на подготовка е и поднесокот до Уставен суд кој во понеделник ќе биде процесуиран, а со кој ќе побараме испитување на уставноста на законот за двојазичност, но истовремено бараме и изрекување на времена мерка за стопирање на имплементацијата на законот. Незаконието мора да запре. Кршењето на уставот не смее да стане пракса која ќе ја премолчуваме. Одговорност мора да има затоа што оваа власт не заслужува да ја води државата. СДСМ мора да си замине и затоа се потребни итни и неодложни предвремени парламентарни избори, рече портпаролот на ВМРО-ДПМНЕ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.