Претседателот на Комисијата за образование и наука на ВМРО-ДПМНЕ, Весна Јаневска на денешната прес-конференција истакна дека денес е 12 aвгуст, точно 19 дена пред почеток на новата учебна година, а Мила Царовска, сѐ уште размислува за сценарио“, односно за моделот за изведување на наставата од можни 3 одобрени на Влада.

-Едно од нив е учениците да посетуваат физички наставa, а дел да следат настав онлајн. Тоа е истиот модел, истото како и минатата година кој заврши успешно со тоа што наставата се одвивала по распоред. На 19 дена пред почеток на учебната година во јавноста не е прикажан ниту еден нов учебник за прво и четврто одделение според новата Концепција за реформи во основното образование. Не видовме како би изгледал во форма на печатен учебник, односно фотокопија, ниту видовме барем еден изготвен дигитален учебник. За дигитални учебници воопшто не станува збор. Бидејќи платформа за подdршка на дигиталните учебници нема, новата иновација на министерката е дека наставниците ќе ги спуштат дигиталните учебници, кои ги нема, на уредите на учениците и ќе ги обучат и учениците и родителите за користење на дигитални учебници, кои на 19 дена пред почеток на учебната година ги нема, вели Јаневска.

Посочува дека електронски уреди за следење на наставата исто така нема, ниту за учениците од прво и четврто одделение, ниту за останатите од ранливите групи кои минатата година останаа без уреди.

-Учебници за останатите одделенија кои не се по новата Концепција исто така нема. Учебници за средните стручни училишта исто така нема. На 19 дена пред почеток на учебната година свидителствата уште не се напишани и најверијатно ќе се пишуваат во последен момент во време кога бројките на заразени од корона вирусот забрзано растат. Според сето ова до сега кажано се јавува оправдан сомнеж дека е можно да се оствари едно единствено сценарио, а тоа е учебната година повторно, како и лани да почне со еден месец задоцнување. Или, можеби ќе почне по секоја цена, без учебници, без дигитални уреди, без подготвени наставници, само колку да почне без оглед на реалната состојба, нагласува таа.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.