Им благодарувaм на граѓаните кои се придржуваат кон мерките, а кои за жал, понатаму можат да бидат изложени на ризик поради оние коишто тоа не го прават, пишува денеска на својот профил на „Фејсбук“ министерот за здравство Венко Филипче.

Коронавирусот ниту е мртов ниту е заминат. Тој е тука и за жал, проблемот ќе се провлекува сè додека има такви кои го ингнорираат. Многу пати повторив, но еве уште еднаш ќе кажам. Здравствените работници не можат сами. Мерките се добри и навремени, но тие функционираат само ако се почитуваат, во спротивно немаат ефект. Почитувањето на мерките и ефектите од нив зависат само од нас како граѓани. Едноставно мора да се прифати новиот начин на живот, мора нашето секојдневие да го прилагодиме почитувајќи ги препораките, дециден е Филипче.

По ората и празнувањето Филипче со апел: Ковид 19 не е мртов, не е заминат, почитувањето на мерките и ефектите од нив зависат само од граѓаните

Но, спротивно на министерот за здравство, неговиот партиски ментор, Зоран Заев и врхушката на СДСМ секојдневно се обидуваат да ги убедат граѓаните дека ситуацијата и кризата се под контрола.

Очајни во обидот што побрзо да се оди на избори, надевајќи се на помала излезност и потесен пораз, СДСМ  го игорираат секојдневниот раст на новозаболени и починати.

Македонија е шампион во црната статистика во регионот и според податоците на worldmeters.info, во земјава во последните 5 дена се регистрирани 70 нови заразени на 1 милион жители. Во Србија има 49, во Бугарија 24, во Албанија 17, а во Грција и Хрватска по 4 нови заразени на 1 милион жители во последните 5 дена. Грција и Хрватска практично излегуваат од кризата и затоа веќе наголемо се подготвуваат за летната туристичка сезона.

Македонија има 54 мртви на 1 милион жители и со оваа најзагрижувачка бројка, таа е апсолутен неславен шампион во регионот. Србија има 27 мртви на 1 милион жители (двојно помалку од нашата земја), а Хрватска, која има речиси занемарлив број новозаразени на дневна основа, има 24 мртви на 1 милион жители. Најмалку мртви (11 на 1 милион жители) се регистрирани во Албанија.

Србија, која може да се пофали со најмногу, безмалку 25.000 тестирања на 1 милион жители, во овој момент бележи најголем број активни случаи на 1 милион жители – 582. Но, Македонија, со 12.129 тестирања на 1 милион жители, има 222 активни случаи на 1 милион жители. Блиску до нас е и Бугарија со 211 активни случаи, додека Хрватска има само 29 активни случаи на 1 милион жители.

Србија има 1.277 вкупно заразени на 1 милион жители, но загрижува фактот дека Македонија, со двојно помалку тестирања, бележи 949 вкупно заразени на 1 милион жители. Сите други земји во регионот се многу подобри од нас, а најдобра е Грција, со вкупно 276 заразени на 1 милион жители.

Инаку, Црна Гора веќе прогласи дека издвојувала победа во борбата со Ковид-19, а во Косово за првпат нема регистрирано новозаразени лица.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.