Заради ефикасно остварување на специфичните интереси на приватниот сектор во насока на унапредување на компетенциите и вештините на високообразовните кадри во согласност со потребите на бизнисот, во Стопанската комора на Македонија, веќе функционира Совет за унапредување на високото образование. Овој Совет има три приоритетни цели кои се состојат во развивање и унапредување на три програми:
1. Клуб на менаџери-претприемништво и лидерство – со едукативни и други настани кои ќе се реализираат преку воспоставување Школо на бизнис -лидери (почеток 25 ноември 2021 година),
2. Развој на мали и средни бизниси и старт ап бизниси – со едукативни и други настани кои ќе се реализираат преку воспоставување Модул за развој на мали и средни бизниси како и Модул за развој на старт ап бизниси (почеток 10 декември 2021 година) и
3. Институт за извоз – со едукативни и други настани кои ќе се реализираат преку воспоставување Школо за продуцирање кадри за зголемување на извозот, со крајна цел формирање Институт за извоз (Изработка на студија за извоз, Платформа за извоз и почеток со Модулот за зголемување на вештините за извоз од 1 Ноември 2022 година).

Во насока на давање на институционална поддршка за активностите во рамките на трите програми одделно, кои Советот ги има зацртано за остварување во следниот период, во Стопанската комора на Македонија на 18.10.2021 година се формираше координативен тим составен од следните претставници:
1. Бранко Азески, претседател на Стопанска комора на Македонија (СКСМ)
2. Фатмир Битиќи, заменик-претседател на Владата задолжен за економски прашања, координација на економските ресори и инвестиции,
3. д-р Фатмир Бесими, Министер за финансии,
4. д-р Анита Ангеловска Бежоска, гувернер, Народна банка на Република Македонија,
5. академик Абдулменах Беџети, Југоисточно-Европски универзитет Тетово,
6. академик Таки Фити, Македонска академија на науките и уметностите,
7. д-р Кочо Анѓушев, претседател на Управниот одбор на Брако Групација,
8. д-р Ристо Јаневски, директор на стратешко планирање и развој, ОКТА АД Скопје,
9. Боријан Борозанов, извршен директор на Џонсон Мети,
10. Арбен Абдурахмани, генерален директор на Везе Шари Тетово,
11. д-р Јелисавета Георгиева Јовевска, потпретседател на Стопанската комора на Македонија,
12. Јадранка Аризанковска, менаџер во Стопанската комора на Македонија и
13. м-р Анета Димовска, менаџер во Стопанската комора на Македонија.

Претседател на координативниот тим е претседателот на Советот д-р Глигор Бишев-“Со овој концепт на функционирање на Советот за унапредување на високото образование му помагаме на стопанството, и овој модел, не е замена за високото формално образование, туку со него ќе се настојува преку практична настава да се создаваат лидери, да се зголемат вештините за водење на бизнис и за прв пат, ваквиот концепт ги вклучува старт ап-ите кои ќе се поддржуваат не само преку учење на вештини, туку и преку финансирање на добри идеи кои ќе бидат поврзани со форуми на инвеститори (преку финансирање од домашни и меѓународни институции). Оттука, со реализација на сите програмски содржини, веруваме дека овој Совет ќе придонесе во зголемување на конкурентноста, ефикасноста, вработувањето и обезбедување поголем економски раст во Република Македонија”.

На состанокот членовите на координативниот тим дадоа целосна поддршка на активностите кои се во насока на унапредување на вештините и компетенциите во согласност со потребите на приватниот сектор. Преку тоа, ќе се помогне во зголемување на знаењата на кадарот во македонските компании за предизвиците што ги носи глобалната конкуренција и новите технологии. Ова претставува практична програма која вклучува и менторство, која во фокусот ќе ги има развојот на менаџерските вештини и корпоративните вредности на компаниите. Со тоа Комората и институциите ќе дадат придонес за развој на најбитниот фактор за раст и успешна работа на компаниите, а тоа е човечкиот фактор, иновациите, и новите технологии.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.