Министерот за здравство Венко Филипче смета дека смртноста во Македонија од ковид-19 не е најголема во регионот и тие професионално ја водат работата. На прашањето дали се чувствува одговорен по последните зголемени бројки на новозаболени и починати од вирусот и кој ќе ја понесе одговорноста, министерот за здравство на вчерашната прес-конференција кажа дека епидемијата е под конторла.

Епидемијата е под контрола, а кажав досега неколку пати зошто така сметаме. Имаме детална слика, проценка на ризик на овој последен бран. Целата работа се води стручно, професионално и изградивме одличен систем за соработка на здравствените работници. Смртноста не е најголема во регионот. Ние имаме наш автентичен начин на евидентирање, за да ги заштитиме луѓето во нивната околина. Досега се откриени 20 пост мортем случаи. Добро се организиравме, имавме добар однос кон јавноста и и понатаму така ќе продолжиме – рече Филипче, одговарајќи на новинарското прашање.

Тој вели дека има суштинска разлика меѓу првиот и овој втор бран.

Тогаш не знаевме што може да очекуваме, не знаевме колку може да се прошири вирусот, имаше многу непознати и за самиот вирус не знаевме колку може да го оптовари здравствениот систем – рече Филипче, кој апелираше до сите граѓани да ги почитуваат мерките на лична заштита, протоколите на движење, држење дистанца и ги повика надлежните тоа да го контролираат и да го казнат таму кадешто има прекршување.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.