Филипче, ништо не е под контрола, сфаќате ли дека сте директен соучесник во смртта на еден куп луѓе кои ги газат овие ходници?

Венко Филипче, сфаќате дека сте директен соучесник кон смртта на еден куп луѓе кои ги газат овие ходници, негирајќи го фактот дека здравствениот систем е во тотален хаос и колапс?
Кого лажете? Дали сте при здрава свест и разум?, прашува пациентка заразена со ковид-19 која во својот статус на фејсбук ја опишува сета неорганизираност и премореност на здравствениот систем за кој министерот тврди дека е под контрола.

Еве само да знаете дека НИШТО НЕ Е ПОД КОНТРОЛА и да видите ЗОШТО има пандемија. Со симптоми седев дома и чекав да се тестирам 10 дена (бидејќи нема термини/нема тестови), решение за изолација добив на Вибер после 4-5 дена од позитивен тест( а во меѓувреме ако не бев совесна, 15 дена имав слобода да се движам и да го ширам вирусот колку сакам и како сакам) и сега згора на сѐ, после 20 дена сеуште чекам да се јави епидемиолог, за да добие решение мајка ми, која се изолираше во ист стан со мене и беше со клиничка слика. По редот на нештата мајка ми од утре треба да почне на работа, на позиција здравствен работник, а притоа и понатака има последици/симптоми и била во директен контакт/престојувала со заразен?
Притоа, на работно место, таа отсуството мора да го оправда (и се јавуваат секој ден) или да си го плати боледувањето од Ковид 19 а моето решение не се зема во обзир.
Контактирани се сите броеви, пишани се пораки – нема никаков одговор од никаде.
Венко Филипче што е под контрола?
Дали знаете во каква состојба е болницата во Битола?Ако не знаете, ќе ви испратам видеа и фотографии, кои ги направив изминатиов период кога морав да ги поминувам тие ходници и да го гледам хоророт на помодрени луѓе кои се гушат, со високи температури, не тестирани кои ги враќаат од шалтер зошто не им е тука местото или пак со последните здивови се приморани да чекаат редици од 50 луѓе пред нив, да видите од прва рака.
Да си видите како лекарите, вашите колеги и сестрите не можат да стојат на нозе, зошто по цело дежурство се по еден и од навала на пациенти не стигаат вода да се напијат а и понатака во ходниците им умираат луѓе. И за тоа не е крив народот драг мој Венко, крив е системот врз кој очигледно веќе НЕМАТЕ АПСОЛУТНО НИКАКВА КОНТРОЛА.
Лицемерно и безобразно е да кажете било што друго.
Дали знаете колку позитивни луѓе се на работа денес, од што нема како да правдаат отсуство?
Дали знаете колку луѓе умираат дома, со пнеумонии и во агонија чекајќи да се тестираат?
Каков третман/заштита од вас/државата добиваат оние кои ви се на прва борбена линија – здравствените работници?
Дали сфаќате дека сте директен соучесник кон смртта на еден куп луѓе кои ги газат овие ходници, негирајќи го фактот дека здравствениот систем е во тотален хаос и колапс?
Кого лажете?
Дали сте при здрава свест и разум?, прашува пациентката заразена со ковид-19.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.