На вечерашната прес-конференција за новите детали околу коронавирусот говореа министерот за здравство, Венко Филипче како и министерот за надворешни работи Никола Димитров.

Како што изјави министерот Филипче, во Македонија има пет нови случаи на коронавирусот и уште два случаи кои што се тестирале во болницата „Жан Митрев“ и за кои во текот на утрешниот ден ќе бидат направени дополнителни тестирања.

Ситуацијата се менува од час во час, ако утре тргнете некаде, не се знае дали ќе имате можност да се вратите. Невообичаено е еден министер за надворешни работи да апелира да не се патува, но такви се состојбите. Мораме за ова да апелираме. Денеска на унгарско-српската граница околу 200 македонски граѓани беа заглавени и по комуникацијата со Романија и Бугарија, очекуваме утре наутро тие да се појават на македонскиот граничен премин Деве Баир – порача министерот Димитров.

Ве молам, немојте да патувате – апелираше министерот за надворешни работи.

Неизвесно е кога ќе може да се вратите. Непредвидлива е ситуацијата. Државите затвораат граници, аеродроми, авиокомпаниите откажуваат летови. Македонските државјани што имаат регуларан престој во други држави да не се упатуваат кон татковината. Има најава дека и ЕУ ќе ги затвори границите за сите несуштински патувања. Граничниот режим на другите држави не зависи од нас – рече Димитров.

Ќе си ги вратиме сите граѓани дома, но упатувам апел до сите што се во земјава да не патуваат, сè е неизвесно. Време е да седиме дома, да бидеме храбри да бидеме смирени – заклучи Димитров.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.