Заменик-претседателот на Владата задолжен за европски прашања Никола Димитров денеска се сретна со министрите за надворешни работи на Австрија, Александар Шаленберг, на Чешка, Јакуб Кулханек и на Словенија, Анже Логар, во рамките на нивната заедничка посета на Македонија и Албанија.

Посетата, како што соопштија од СЕП, се случува во пресрет на јунскиот самит, во контекст на засилениот ангажман за официјален почеток на пристапните преговори со ЕУ, како стратешки императив за регионот во целина и тест за сериозноста на ЕУ во однос на спроведувањето на одлуките за европската иднина на регионот.

Вицепремиерот Димитров се заблагодари за активната, гласна и принципиелна поддршка на трите земји-членки на ЕУ, како и за заложбите на министрите за надминување на пречките за усвојување на преговарачката рамка на Македонија со ЕУ и одржување на меѓувладината конференција, која според многумина, вклучително овие земји, одамна требаше да се случи.

Испорачувањето на ЕУ кон Македонија ќе претставува потврда на посветеноста на европската перспектива на регионот, но и почитување на сопствените одлуки и афирмирање на европските вредности. Крајно време е за одлучен исчекор кон заедничка европска иднина и обновување на европската визија во регионот, имајќи предвид дека се соочуваме со знаци на бледнеење на европската идеја. Тоа на Балканот може да резултира со актуелизирање на одредени идеи кои се сѐ само не европски, рече Димитров.

Министрите за надворешни работи на Австрија, Чешка и Словенија ги потврдија своите ставови и официјалните позиции во насока на неодложно валидирање на постигнувањата на Македонија во процесот на пристапување кон ЕУ, преку цврстата посветеност на спроведување на реформите кои значат вистинско приближување кон европските стандарди, но и лидерството за надминување на тешките прашања.

Со пријатели кои зборуваат искрено, добронамерно и во еден глас, би можеле да дојдеме до европски успех на Балканот, толку потребен за сите, заклучи Димитров.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.