На 10. „Македокс“ ќе бидат доделени награди во пет категории, и тоа: „Кромид“ за најдобар филм во Главната програма, „Млад кромид“ за најдобар филм од нов автор, „Сечкан кромид“ за најдобар краток филм, „Кокарче“ за најдобар филм од Студентската програма и Наградата за филм со најдобри етички идеи. За наградите одлучуваат пет комисии составени од 15 еминентни странски и домашни автори.

Жирито за наградата „Кромид“ е во состав Ен Жорже, француска режисерка на документарни филмови кои биле прикажувани на Арте; Инеке Смитс, која дипломирала на Уметничката академија во Ротердам, а по магистерските студии на Академијата за филм и телевизија во Англија почнала да снима документарни филмови и да предава на различни меѓународни проекти за млади филмаџии; и Виктор Еде, продуцент и филмски автор од областа на документарниот филм и аудиовизуелните уметности.

Жирито за наградата „Млад кромид“ е во состав Винсент Дјут, синеаст кој по завршувањето на студиите по историја на уметност се вклучил во Институтот за напредни студии по снимање (ИНСС), а потоа привремено престојувал во Рим и Њујорк; Виола Штефан од Хајделберг, Германија, авторка, режисерка, продуцентка и копродуцентка на дваесет документарни ТВ-филмови, но има работено и како предавач за театар, филм и визуелни комуникации; и македонскиот режисер Ѓорче Ставрески, чиј дебитантски долгометражен филм „Исцелител“ за само една година бил избран на 56 филмски фестивали и добил 17 меѓународни награди.

Жирито за наградата „Сечкан кромид“ е во состав Анка Паунеску од Брасов, Романија, која дипломирала на Универзитетот во Сибиу, отсек германска филологија, и на Прашката филмска школа, отсек документарен филм; Ондреј Каменицки, директор на Меѓународниот филмски фестивал за човекови права и документарни филмови во Чешка; и македонскиот монтажер Мартин Иванов, кој дипломирал на Факултетот за драмски уметности во Скопје, отсек филмска и ТВ монтажа, а како монтажер дебитира на долгометражниот игран филм „Исцелител“ на Ѓорче Ставрески, но има работено како асистент монтажер на повеќе од 10 играни и документарни филмови.

Жирито за наградата „Кокарче“ е во состав Јасмин Башиќ, филмска историчарка и програмерка, магистер по филмска уметност и англиски јазик, како и коосновачка и членка во бордот на „Про шорт“, швајцарска асоцијација за кратки филмови; Мартина Валентина Баумгартнер, режисерка која од 2018 година соработува со програмата „Нипков“ на повеќе проекти кои истовремено вклучуваат филм, логистика, луѓе и приказни; и Илеана Станкулеску од Букурешт, Романија, која дипломирала на Универзитетот во Париз, Франција, а студиите ги продолжила на Филмската академија „Конрад Волф“, отсек сценарио и филмска драматургија во Постдам, Бабелсберг.

Наградата „Кокарче“ за најдобриот филм од Студентската програма на „Македокс“ за прв пат, благодарение на Current Time TV, ќе биде парична и ќе бидат доделени 2.000 евра за студентскиот филм што ќе победи со одлука на стручното жири.

Жирито за наградата Филм со најдобри етички идеи е во состав Виван Сторлунд, доктор по правни науки, истражувачка и новинарка, а нејзините истражувања се фокусираат на новите услови во дигиталната доба која ја смета за време што нуди огромни можности, иако истовремено е притисната од застрашувачки закани; Џон Периш, музичар и уметник кој го остварил својот креативен потенцијал како композитор, соло-музичар, продуцент и соработник, а познат е по својата работа со Пи Џеј Харви, Алдус Хардинг, Илс, Џајнт Сенд; и македонскиот професор по филозофија Ристо Солунчев, кој работи како вонреден професор на Институтот по филозофија, на Филозофскиот факултет во Скопје и предава нововековна, германска класична и современа филозофија.

Наградите ќе бидат објавени и доделени на затворањето на 10. „Македокс“ на 28 август, во 20 часот, во Куршумли-ан.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.