Во понеделник (05.07.2021г.) со почеток во 12:00 часот во сутеренот на Национална опера и балет (простории на АНИП „Орце Николов“) ќе се одржи промоција на монографијата „75 ГОДИНИ – ПОВЕЌЕ ОД ИГРА И ПЕСНА“ на Ансамблот на народни игри и песни „ОРЦЕ НИКОЛОВ“.

Промотор на настанот е проф.д-р Мирјана Мирчевска, влезот е слободен, а промоцијата ќе се одржи согласно протоколите за одржување на настани.

Народното творештво е постојан придружник на нашиот народ како во минатото, така и денес. Тоа живее со нас и ќе продолжи да ги придружува сегашните и идни наши поколенија.

Во македонското народно творештво е впишан „кодот“ на историските настани и културни влијанија и тие денес претставуваат дел од македонската културна ризница.

Низ игра, песна и музика, задоени со вековното духовно и културно богатство илјадници вљубеници во македонскиот фолклор – членови на Ансамблот „Орце Николов“, станаа „чувари и пренесувачи“ на сè она што нашиот народ со векови го ткаел, како дел од своето битисување.

Ансамблот на народни игри и песни „Орце Николов“ од  Скопје е формиран 1945 година, со цел да ги негува и прикажува обичаите, народните игри, песните, музиката, инструментите и носиите на Македонија и пошироко.

Во изминатите години Ансамблот „Орце Николов“ постигна забележителни резултати и успеси на полето на фолклорното творештво, за што говорат повеќе од 400 домашни и меѓународни награди и признанија, а гостувајќи на голем број фестивали во светот се здоби со високо реноме и светска афирмација.

Значењето на 75-годишниот јубилеј на Ансамблот на народни игри и песни „Орце Николов”- Скопје, како еден од првите зачетоци на културно-уметничкиот аматеризам во Скопје и Македонија упатува на потребата од негово достојно и организирано одбележување.

Во Ансамблот „Орце Николов“ минале повеќе од 15.000 членови кои приредиле околу 6.700 концерти во земјата и ширум светот.

Концертите ги следеле повеќе од 10 милиони гледачи, а уште десетици милиони гледачи ги следеле настапите на телевизиските канали во земјата, но и во САД, Канада, Бразил, Куба, ДНР Кореја, Англија, Белгија, Франција, Холандија, Швајцарија, Шпанија, Шведска, Германија, Италија, Чешка, Словачка, Полска, Португалија, Романија, Кипар, Турција, ТР Северен Кипар, Словенија, Хрватска, Србија, Црна Гора, Албанија, Бугарија, Босна и Херцеговина,…

Составен дел на програмските активности е и Монографијата насловена „75 години повеќе од игра и песна“ која дава еден сериозен приказ на дел од позначајните активности на Ансамблот реализирани во неговото 75- годишно делување, потврдувајќи ги вистинските вредности и оставајќи трајни белези во македонската култура и живеење.

Монографијата дава еден модерен приказ на традициските, националните и други вредностите што ги поседува нашиот ансамбл, неговото значење во зачувувањето, негувањето и презентирањето на фолклорното богатство на домашната и меѓународната сцена, а исто така ќе даде и значаен придонес и за научната и друга јавност.

На едно место се зачувани голем број записи кои се потврда за огромните успеси на Ансамблот „Орце Николов“ – Скопје и македонскиот фолклор на домашната и на меѓународната фолклорна сцена.

Дел од програмските содржини на Ансамблот „Орце Николов“ посветени на 75-годишниот јубилеј, меѓу кои и Монографијата, беа поддржани од Министерството за култура на Република Македонија, Град Скопје, Општина Центар – Скопје, за што и во оваа пригода им изразуваме искрена благодарност.

Овие седум и пол децении опстојавме и ги чуваме нашите јасни и недвосмислени аргументи за она:

..што сме биле, што сме, и што треба да бидеме и опстанеме!

Мисијата на ансамблите, како што е „Орце Николов“ е да ја зачуваат „свежината и изворноста“, зашто фолклорот не само што треба да се сака, туку треба и да се разбере.

Само така ќе се разбереме и самите себе?



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.