Министерот за култура  Хусни Исмаили денеска во својот кабинет оствари средба со директор на Турскиот културен центар – Институт „Јунус Емре“, Серхат Кула.

Од Министерството информираат дека „на средбата  министерот Исмаили и директорот Кула го изразија своето задоволство од досегашната соработка во делот на културата, а стана збор и за идните проекти со кои ќе се придонесе за развивање и продлабочување  на пријателските  односи и  меѓукултурната соработка меѓу  Република Македонија и Република Турција“.

Во тој контекст директорот Кула информираше за реализацијата на повеќе проекти, културни активности и курсеви, кои придонесоа  за афирмација и презентација на  Турција,  турската  култура, уметност, историја и традиција, како и  за подоброто запознавање на турскиот и македонскиот  јазик, културата и религијата на двете земји. Двајцата соговорници  го изразија своето задоволство и од текот на активностите за заокружување на процедурата за отворање на Македонскиот  културен центар во Истанбул,  како и за процедурата околу објектот Куршумли ан, каде што ќе биде сместен Турскиот културен центар. На средбата министерот Исмаили подвлече дека токму отворањето на  Културно-информативните центри во Скопје и во Истанбул, е уште една можност, локалните култури да добијат глобални размери, велат оттаму.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.