„Доста е!“ – Протестен перформанс пред Министерството за култура

Со протестен перформанс, извикувајќи „Доста е!“ и „Култура сега“, група културни работници застанаа пред Министерството за култура за да го изразат нивниот револт поради одлуката за генерален директор на НУЦК „Антон Панов“ во Струмица да се назначи професор по физичка култура

Тие беа на средба со надлежните, откако повикаа да запре автократското владеење со културата, јавните добра и културните институции.

Вие останувате глуви и не сакате да ја увидите потребата на културните работници кои со години наназад се соочуваат со проблеми од таквото владеење“, истакна претходно струмичкиот актер и активист Стојан Велков. До кога некомпетентни кадри ќе се ставаат на раководни позиции на културните институции? До кога ќе се вадите на формално-правно издржаните конкурси каде квази читања на критериумите ја регулираат културата? До кога истите критериуми се читаат на еден начин за едни, а на друг начин за сосема други?“, ги праша надлежните.

Културните работници се револтирани бидејќи како што велат, избраниот кандидат за директор на НУЦК „Антон Панов“ не ги поседува потребните квалификации. Велков реагира што културните работници се понижувани, обесправени и дискриминирани. Прашува до кога ќе се обезвреднува образованието од областа на културата и уметноста.

Актерите уште еднаш упатија апел да се преиспита одлуката и да се поништи. Тие вчера имаа и протестна акција пред платото на НУЦК „Антон Панов“ во Струмица. Нивната иницијатива досега ја поддржале 322 културни работници.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.