Претседателот на Владата, Зоран Заев, беше на увид во завршната фаза на изградбата на мостот на Пчиња кај Долно Коњаре.

Како што соопшти владината прес-служба, придружуван од пратеникот во Собранието Зеќир Рамчиловиќ, премиерот Заев истакна дека увидот во последната фаза од изградбата на мостот на реката Пчиња којшто ги поврзува Долно и Средно Коњаре се совпаѓа со Меѓународниот ден на Бошњаците, кој припадниците на оваа заедница во нашата земја го прославуваат на 28 септември.

На иницијатива на пратеникот Зеќир Рамчиловиќ, Владата донесе одлука со која мостот се именува „Цветот на Сребреница“, и врз основа на таа одлука се поставени и табли со називот на  мостот со што испраќаме порака на сеќавање и за осуда на секој геноцид за да не се заборави и да не се повтори – изјави Заев.

Истовремено, Заев го честиташе Меѓународниот ден на Бошњаците на сите припадници на оваа заедница во нашата земја.

Новиот мост во Долно Коњаре е изграден целосно со средства на Јавното претпријатие за државни патишта. Инвестицијата е вредна нешто повеќе од 60 милиони денари и со неговата должина од 133 метри е најдолгиот мост што поврзува регионални патишта во нашата земја.

Со широчина од 7,96 метри, со две коловозни ленти и со два тротоари, мостот ги исполнува сите стандарди за одвивање на сообраќајот и за движење на пешаците.

Во последната завршна фаза поставена е „еластична ограда”, банкина, по должината на мостот, а поставени се и светлечки сигнални обележувачи на оградата на мостот кое ќе биде довршено со канделабри со што целосно ќе биде завршен овој значаен инфраструктурен објект, се наведува во соопштението.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.