Тутунарите не се задоволни со откупните цени на тутунот, каде според министерството за земјоделство просечната откупна цена досега изнесувала 181 денари за килограм, а биле откупени 1,7 милиони килограми. Од новоформираните тутунски здруженија велат дека оваа цена била прениска бидејќи годинава тутунот бил со одличен квалитет. Според сегашните цени по класи просечната цена не смеела според нив да биде пониска од 220 денари.

„Тутунарите се оставени од страна на државата да бидат ограбувани на вагите. Тој игнорантски однос на власта ја доведува во прашање егзистенцијата на 30.000 семејства кои живеат исклучиво од тутун. Апелираме до единствениот, кој во моментов е фактор во откупот, а тоа е државниот земјоделски инспекторат, преку своите инспектори да бидат присутни секојдневно на терен“, истакна Игор Мирчески, координатор на новоформираните тутунарски здруженија.

И од Сојузот на земјоделски здруженија не се задоволни од откупните цени. Тие овие денови остварувале поединечни средби со сите 8 откупувачи за да се зголеми цената на тутунот.

„Не можеме да кажеме дека сме задоволни затоа прво е почеток на откуп, има преземено мали количини и денеска се отвораа и последните откупни ваги. Ќе следиме деновиве да видиме до каде ќе достигне просечната цена за доколку мислиме дека истата нема да биде задоволителна ние ќе преземеме се што ни дозволува законот“, рече Менде Стомнароски, претседател на Сојузот на земјоделски здруженија.

Откупувачите имаат потпишано договори за отклуп на 22 милиони килограми тутун, а тутунарите не очекуваат годинава да има повеќе од 20. Така што освен во квалитетниот род шансата за повисоки цени ја гледат и во недостигот на тутун.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.