Министерството за труд и социјална политика ги повикува стечајните работници кои ги исполнуваат условите за добивање надомест согласно со новиот Закон за стечајци, што беше изгласан вчера во Собранието, да се пријават во Агенцијата за вработување во рок од 30 дена.

Со новиот Закон за материјално обезбедување на невработените лица поради приватизацијата на претпријатијата со доминантна сопственост на државата, Министерството за труд и социјална политика обезбеди паричен надомест за уште 1 100 стечајци.

Согласно Законот за стечајци, невработеното лице, треба да има најмалку 14 години работен однос во претпријатија со доминантна сопственост на државата.

Останатите услови остануваат исти како и со досегашното законско решение, односно работниот однос на невработеното лице да му престанал по основ на стечај, ликвидација или технолошки вишок, заклучно со 31 декември 2020 година, во претпријатие со доминантна сопственост на државата или на кое работниот однос му престанал по основ на стечај, ликвидација или технолошки вишок, по приватизација на претпријатието, под услов истиот да бил заснован додека претпријатието било со доминантна сопственост на државата.

На денот на поднесување на барањето, невработеното лице треба да е на возраст од најмалку 52 години (жена), односно 55 години (маж); да остварило право на паричен надоместок по 1 јануари 1993 година и од 31 декември 2020 година до денот на влегување во сила на овој закон, да не било во работен однос.

Министерството за труд и социјална политика ги повикува сите лица кои ги исполнуваат условите, во рок од 30 дена на влегувањето во сила на овој закон, да се пријават во Агенцијата за вработување за да ги остварат своите права, стои во соопштението.

За спроведување на овој закон на месечно ниво ќе бидат потребни 13.093.300 денари, односно за 4 месеци од 2021 година околу 52.373.200 денари.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.