Ограбените штедачи од Еуростандард банка непосредно пред изборот на Павлина Црвенковска за претседател на Судскиот совет, потсетуваат на долгот на нејзиниот сопруг кон Еуростандард банка. Зад грабежот на нивните депозити велат дека стои добро организирана мрежа на разни измамници. Во таа мрежа не се само вклучени раководните лица на Еуростандард банка, гувернерката Анита Ангеловска Бежоска и нејзиниот прв тим од Народна банка, туку и сопствениците на фирмите кај кои завршувале парите или служеле како посредници.

Еден од тие учесници во грабежот на нашите пари, за што веќе и објавивме, е Зоран Црвенковски, сопственик на фирмата должник Екопласт Рисајклинг доо увоз-извоз од Скопје, сега во стечај. Оваа фирма има долг од 1,6 милиони евра кон Еуростандард банка, а за којшто нема платено ниту една рата повеќе од две години пред затворањето на банката во август минатата година. Во времето кога и е одобрен кредитот, фирмата веќе била презадолжена повеќекратно од нејзниот капитал и со големи загуби. Со други зборови, Зоран Црвенковски свесно земал милионски кредит во евра врз основа на ултра лоши перформанси на фирмата и четири пати помало обезбедување, а за истиот не платил ниту денар повеќе од две години. Долгот кон банката сега и не може да се наплати, бидејќи не само што е неосновано одобрен како кредит, туку намерата да тој воошто не се врати се гледа и во свесното носење на фирмата во стечај. За тоа што Зоран Црвенковски со умисла го земал милионскиот кредит во евра односно нашите лични пари и потоа свесно со умисла ја довел фирмата во стечај, очекуваме да одговара пред судските органи, велат оштетените штедачи.

Тие прашуваат дали Зоран Црвенковски ќе дочека да одговара за делото со оглед на тоа што неговата сопруга Павлина Црвенковска е член на Судскиот совет, претходно судски советник во Апелациониот суд во Скопје, со амбиција да стане и претседател (во меѓувреме е веќе избрана за претседател на Судскиот совет, н.з.).

Како вршител на јавна функција, се прашуваме зошто Павлина Црвенковска не ја пријавила во нејзиниот анкетен лист и сопственоста на нејзиниот сопруг во фирмата Екопласт Рисајклинг, а уште помалку земените а не вратени пари во износ од 1.600.000 евра. Вкупната вредност на се што е пријавено во нејзиниот јавно достапен анкетен лист, заедно со имотот на нејзиниот сопруг, изнесува околу 65.000 евра, што е неспоредливо помалку од нашите пари коишто завршиле кај нејзиниот сопруг. Тоа се туѓи пари кои Зоран Црвенковски ќе треба да одговори каде се наоѓаат и истите да ни се вратат. Длабоко сме уверени дека ова е и еден од одговорите зошто упорно се молчи за сторениот организиран криминал и корупција во случајот со грабежот на депозити во Еуростандард банка.

 



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.