Сексуалните работници, здружени во СТАР, прв колектив на сексуални работници на Балканот, и нивните поддржувачи ХОПС – Опции за здрав живот Скопје и Коалиција Маргини, годинава, по 13. пат се приклучуваат кон глобалното одбележување на 17 Декември – Меѓународниот ден за СТОП на насилството врз сексуалните работници.

Како што се вели во соопштението на СТАР, овогодинешната кампања насловена „НИЕ“ ја посветуваат на борбата против насилството и дискриминацијата со кои се соочува нивната заедница, особено во кризни ситуации како што е актуелната состојба со пандемијата на Ковид-19.

„НИЕ“ е кампања преку која сексуалните работници сакаат да испратат пораки до јавноста и институциите за проблемите и потешкотиите со кои се соочуваат за време на пандемијата на корона вирусот.

Сакаме да потенцираме дека сме сериозно погодени од кризата предизвикана од Ковид-19, од здравствен, економски и социјален аспект. Кризата не втурна во сиромаштија и во сериозни ризици по нашето здравје, додека не добиваме никаква поддршка од институциите со цел да се намалат негативните последици од кризата по нашата благосостојба –  пишува во соопштението.

Сексуалните работници, како особено ранлива попоулација во време на пандемијата на корона вирусот, бараат вклучување во владините социо-економски мерки за заштита, пристап до соодветни заштитни здравствени услуги со цел превенција на ширење на вирусот, подеднакво уживање на работничките права, полесен пристап до социјална помош, како и надминување на стигмата, неправдата и дискриминацијата која е присутна кон нашата заедница од повеќе аспекти.

Клучни барања од институциите за заштита и поддршка на сексуалните работници се да бидат препознати како особено ранлива популација на Ковид-19 и последиците од Ковид-19, да се формулира пакет социо-економски мерки со цел таргетирана поддршка за оваа заедница, да се обезбеди непречено функционирање на услугите и програмите за ХИВ, намалување на штетите од употреба на дроги, превенција и поддршка на жртви на насилство за време на пандемијата, да им се овозможи континуиран пристап до квалитетни здравствени услуги, помеѓу кои и олеснет пристап до хормонска терапија на трансродовите лица, да бидат вклучени во процесите на креирање национални протоколи и политики како одговор за време на пандемијата, да се препознае сексуалната работа како работа и да се почитуваат нивните работнички права и да им се обезбеди здравствена и социјална заштита за време на кризата.

Оваа година, грижејќи се за сопственото и јавното здравје, нема да го организираме традиционалниот Марш на црвениот чадор, меѓутоа ќе одржиме прес конференција на 17 декември со почеток во 12 часот пред фонтаната „Воин на коњ“ на плоштадот „Македонија“. Прес-конференцијата ќе се одржи во согласност со сите важечки протоколи и мерки за организирање на јавни настани од овој тип, со строго почитување на мерките за заштита од ширење на Ковид-19 вирусот – истакнуваат од СТАР.

Меѓународниот ден за СТОП на насилството врз сексуалните работници првпат беше одбележан во 2003 година, како спомен и бдеење за жртвите на убиецот од Грин Ривер во Сиетл. Оттогаш, со одбележување на овој ден им се овозможува на сексуалните работници ширум светот да се здружуваат и со заеднички сили да се борат против дискриминацијата и насилството.

Овогодинешната кампања „НИЕ“ по повод обележувањето на 17 декември – Меѓународниот ден за СТОП на насилството врз сексуалните работници, е поддржана од Фондација Отворено општество – Македонија и „SWAN – Sex Workers’ Rights Advocacy Network“.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.