Министерката за труд и социјална политика Јагода Шахпаска изјави дека очекува од пратениците што побрзо да го донесат законското решение со кое се овозможува недела да биде неработен ден бидејќи, како што рече, тој е во интерес на сите граѓани.

Во интервју на „Утрински брифинг“, Шахпаска потсети дека за овој предлог закон, што е во второ читање на Комисијата за труд и социјална политика, имало неколку обиди да се отвори амандманска расправа уште пред локалните избори.

Таа вели дека интересот за носењето на ова законско решение од страна на граѓаните е огромно.

До Министерството за труд и социјална политика секојдневно пристигнуваат прашања, кога ќе стапи во сила ова законско решение, од синдикатите исто така. Станува збор за едно законско решение за кое што ние заедно со социјалните партнери во Економско социјалниот совет, го преговаравме преку јавни и широки дебати во општеството, почнувајќи од декември минатата година досега и е усогласено меѓу социјалните партнери – изјави Шахпаска.

Со законското решение недела неработен ден осум проценти од работниците ќе работат во недела, за нив е предвидена минимум 50 проценти повисока дневница, додека пак вработените во трговските центри ќе работат само една смена со 100 проценти повисока дневница. Два проценти од годишниот промет на трговските центри во недела е предвидено да оди за изградба на градинки.

Ова законско решение претставува баланс меѓу приватниот и професионалниот живот на граѓаните – се наведува во соопштението на МТСП.

Шахпаска на прашањето околу подготовката на новиот Закон за работни односи посочи дека ова законско решение е подготвено и дека наскоро ќе биде отворена и широка јавна расправа. Како значајна новина која го носи ова законско решение, таа го посочи скратувањето на времетраењето на Договорите на определено време, кои во моментов се со времетраење до пет години. Како што вели, тоа е барање на работниците кое со години наназад.

Со договорите на определено време, ќе се гарантира поголема сигурност и пристап до права за работниците, а за работодавачите овие договори генерираат задоволни работници. Во подготовката на новиот закон за работни односи, учествуваа сите чинители во општеството, претставници на работниците, работодавачите, Меѓународната организација на трудот, експерти од областа на трудот. Во социјалниот дијалог нема победници и поразени, туку целта е да се постигне компромис меѓу сите засегнати страни – изјави Шахпаска.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.