Помпезните најави на Владата за концептот за „недела неработен ден за сите“ како мерка кон унапредување на работничките права и социјалната правда е уште една манипулација од Пи-Ар фабриката на власта предводена од СДСМ.

Како една од главните придобивки од оваа мерка, премиерот Зоран Заев, како и министрите за економија и труд и социјална политика, Крешник Бектеши и Јагода Шахпаска, го истакнуваа тоа што работниците кои ќе работат во недела (во дејностите кои ќе имаат дозвола за такв нешто) ќе имале двојно поголема дневница и слободен ден во текот на следните седум денови.

Сепак, никој од нив, ни Заев, ни Шахпаска ни Бектеши, не кажа дека такви одредби, односно поголема дневница за работа во недела или на празник, како и добивање друг слободен ден во текот на неделата го предвидуваат и веќе постоечките законски норми, предвидени со Законот за работни односи, како и колективните договори. А, во тој закон јасно е предвидено колку треба да трае работната недела и како се уредува ноќната, празничната и сменската работа.

Оттука се поставува прашањето зошто власта, доколку навистина е загрижена за работничките права, не се занимава со причините поради кои постојано се кршат законите што ги штитат токму тие права. За време на бомбастичните прес-конференции никој не кажа што навистина инстититуциите преземаат за спречување и казнување на базични проблеми во трудовиот сектор како што се: работата на црно, исплаќањето плата во плико, неисплаќање на празнични дневници, прекувремена работа, ноќна работа, минат труд, денови од одмор и слично. Дополнително, на многумина во Македонија им е јасно дека во многу дејности и фирми такво нешто не се почитува, ниту пак, има адекватна реакција од инспекциските служби. Напротив, поверојатно е работникот што ќе ги пријави тие прекршувања да „го извлече подебелиот крај“.

Можен одговор на овие прашања и вистинската намера на оваа мерка, како што е најавена, се крие во „ситните букви“ од Владинито соопштение. Токму тука се појавува практично единствениот новитет што Владата планира да го воведе, а тоа е дека фирмите што ќе работат во недела и на празници, односно ќе бидат вклучени во исклучоците определени од Владата, ќе треба да плаќаат надоместок во висина од 2% од вкупниот приход остварен во претходната година во  недела и на празници. Тоа покажува дека мерката донесена за наводно подобрување на правата на работниците, всушност ќе придонесе за полнење на Буџетот, а работниците ќе ги имаат истите права што ги имаат и сега, но институциите не ги штитат.

Зошто баш од октомври?

Дополнителна симптоматичност околу воведувањето на оваа мерка е моментот на нејзиното стапување во сила, односно први октомври годинава. Тоа е нешто помалку од четири месеци од сега, време што се чини премногу долго за работниците да добијат поголеми права, како што тврдат од власта.

Сепак, датумот на стапување на сила на оваа мерка е непосредно пред одржувањето на локалните избори, со што се отвора сомнежот дали преку модалитетите на спроведување на оваа мерка, ќе се врши предизборен поткуп и притисок, слично на тоа што се случуваше пред парламентарните избори со разни „социјални мерки“ на власта.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.