Стоковите резерви во државата во делот на енергенти и во делот на продукти се на нивото кое е неопходно според меѓународните стандарди, оцени вечерва претседателот Стево Пендаровски.

-Имаме доволно енергенти во овој момент за најмалку четири месеци за нормално функционирање на државата. Оценката што ја изнесов е врз основа на писмена документација и документ кој го имам од Бирото за стокови резерви. Тие стоеја зад тоа дека ние имаме во овој момент сосема доволно залихи во тој дел, рече Пендаровски во одговор на прашање по денешната седница на Советот за безбедност.

Тој посочи дека бројките во Бирото за стокови резерви се менуваат на дневна основа.

-Јас не ги имам сите бројки во овој момент бидејќи тоа е дневна периодика. Меѓутоа, јас би упатил на Владата каде што постојат не само директор за управување со стокови резерви, туку и во Владата тоа го имаат на дневна основа. Пред секоја седница на Влада во изминативе две-три недели откога почна целата работа, овој проблем со епидемијата, тие имаат како еден вид на предточка да реферираат каква е состојбата со стоковите резерви, рече Пендаровски.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.