Агенцијата за супервизија на осигурување (АСО) им препорача на осигурителните друштва кои 2020 година ја завршиле со добивка, да се воздржат од исплата на дивиденда.

Препораката е испратена до сите осигурителни компании на домашниот пазар за осигурување.

АСО согледувајќи ги состојбите на осигурителниот пазар во актуелниот контекст одлучи дека постојат неколку објективни околности кои целосно ја оправдуваат препораката за воздржување од исплата на дивиденда. Еден од клучните фактори за носење на препораката е фактот што вкупните приходите од бруто полисирана премија (БПП) на целиот осигурителен пазар лани се намалени за 5 отсто во споредба со претходната година. Дополнително на горенаведеното врз носењето на препораката влијае и тоа што од почетокот на годинава побарувањата нема да се признаваат како средства за покривање на техничките резерви на осигурителните друштв – информираат од АСО.

Оттамун потсетуваат дека за зголемување на заштита на правата на осигурениците, односно купувачите на осигурителните полиси, и истовремено зајакнување на солвентноста и стабилноста на осигурителните компании донеле три суштински значајни правилници чија примена стапи во сила од почетокот на оваа година.

Од АСО потенциарат дека имплементацијата на овие правилници, за осигурителните компании ќе значи дополнително вложување финансиски средства и ресурси.

Агенцијата за супервизија на осигурувањето е независно регулаторно тело, основано во 2009 година, кое го регулира пазарот за осигурување и се грижи за заштита на правата на осигурениците и развој на перцепцијата за значењето на осигурувањето.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.