Над 525 илјади евра биле исплатени за патни трошоци на пратениците во Собранието минатата година, покажува анализата на „Макфакс“ од податоците до кои дојдоа користејќи го Законот за слободен пристап до информации од јавен карактер. Анализата покажува дека донесувањето на законските измени со кои беше намален надоместокот за користење личен автомобил за службени цели влијаело при намалувањето на патните трошоци, но сепак на голем дел од пратениците сè уште им се исплатуваат по илјада евра месечно за да одат на работа до Собранието, а потоа да се вратат дома во градовите од внатрешноста.

До мај минатата година рекордер беше Бети Рабаџиевска од СДСМ, која живее во Ресен, со потрошени 11.700 евра, а веднаш зад неа Мира Стојчевска од СДСМ од Делчево со 10.396 евра и Алија Камбероски од партијата ПЕИ од Струга со 10.355 евра потрошени за патни трошоци.

Во вторите 6 месеци од годинава, односно од јуни до ноември, на врвот на листата повторно е Камбероски со 8.356 евра, потоа Рабаџиевска со 7.728 евра, Зоран Илиоски од ВМРО-ДПМНЕ од Битола со 7.680 и Емилија Александрова од одметнатите пратеници од ВМРО-ДПМНЕ од Берово со потрошени 7.121 евра.

На годишно ниво, сепак, рекордери се Рабаџиевска, Стојчевска и Камбероски.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.