Уште во предизборието имавме такви неколку состаноци со регионалната Стопанска комора во Битола, разговаравме за тоа кои се нивните објективни проблеми, кои се нивните субјективни проблеми, потсети по денешниот состанок претседателот на ВМРО-ДПМНЕ, Христијан Мицскоки, додавајќи дека уште тогаш кога зборувале со луѓето од бизнис заедницата ветиле дека кога ќе имаат можност ќе сторат сè што е во рамките на законите, сè што е во рамките на процедурите, тоа што било заглавено, тоа што било закочено поради објективни, но и субјективни причини да биде одглавено и откочено за да може да се развива и за да може Битола да се развива, а со тоа да се развива и целиот регион.

Битола е носител не само економската туку и демографската активност во овој регион. За мене секогаш претставува чест и задоволство кога сум тука, градоначалникот на општина Битола, пратеничката, советникот и останатите присутни кои што беа денеска со нас сведочеа дека ваков состанок можеби и првпат после една деценија се случува овдека во Битола, каде што можеме отворено да разговараме за проблемите и потребите на бизнис заедницата. И на мое лично задоволство неколку од тие проблеми веќе на самиот состанок беа би рекол решени и беа закажани состаноци во текот на следната недела. Забелешките беа дека претходната администрација на Општината била целосно затворена не само за граѓаните туку и за бизнис заедницата, нешто сакаме ние да го промениме и што беше едно од основните наши би рекол заложби за време на кампањата. И повеќе добив информација од 7.000 предмети во постапка на легализација биле закочени, а она што можевме да слушнеме е дека во периодот од следниве две недели повеќе од 1.000 веќе ќе бидат завршени и граѓаните и правните лица ќе го добијат тоа што им следува. Така што очекувам динамичен развој на Битола и да го врати сјајот кој го заслужува, сјајот на конзулски град, тоа што и е, рече Мицкоски.

Тој најави еден нов проект, кој, како што кажа, ќе го побара од партиските органи, но и од неговите соработници, а тоа е проектот „Отворено со граѓаните – создаваме нова иднина“ којшто е дел од столбот на неприкосновена борба со криминалот и корупцијата.

Ќе работи тим кој ќе го сочинуваат професионалци и експерти, луѓе и од партијата, но од граѓанскиот сектор, каде што граѓаните ќе можат отворено да пријават доколку постои било каква злоупотреба на нивното право од страна на општинската администрација во оние општини во кои се разбира ВМРО-ДПМНЕ има мнозинство во советот и градоначалник. Но, истовремено ќе пријават свое задоволство и незадоволство и ќе ја следат реализацијата на програмата со којашто излеговме на овие локални избори за да можеме и ние како раководство и јас лично да го следиме она што сме го ветувале за време на кампањата. Затоа што не е само да ветите, туку и тоа што ќе го ветите треба да го испорачате, а тоа што го испорачувате треба да го испорачате чесно и достоинствено, затоа што граѓаните тоа го очекуваат од нас. Преку глава им е од батиња, татиња и слични злоупотреби кои се случуваа изминативе 4 па и повеќе години. Затоа ја користам оваа прилика да го соопштам овој проект овде пред битолската јавност, бидејќи за мене тоа значи многу, отворање на еден нов лист во начинот на функционирање на општинската администрација но и понатаму очекувам тоа да го пресликаме и во централната администрација, затоа што само на тој начин ние можеме да бидеме поуспешни доколку граѓаните бидат нашиот мотив, а правото и правдата бидат наша обврска во работењето. Тоа го кажав и овде во Битола пред бизнис заедницата тоа ќе го повторам и пред вас. Настрана од сите шпекулации, сите зли јазици, сите злонамерни коментари. Ниту оваа администрација, ниту било кој од нас има концесија кон било кого, единствената концесија е кон битолчани и кон народот на Македонија и така и ќе работиме. Било која злоупотреба од било кого кој се повикува на некакви моќници и центар на моќ е лична и јас ќе бидам тој кој ќе биде првиот борец против таквите ликови кои ќе злоупотребуваат такви самонаметнати и самопрогласени центри на моќ, порача Мицкоски.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.