Собранието го изгласа Законот со кој се овозможува дополнителна поддршка за лозарите кои го предале своето грозје кај регистрирани винарски визби, како и на винарски визби за транспортните трошоци при извоз. За поддршка на лозарите предвидени се 6.700.000 евра, а парите ќе им бидат исплатени до крајот на годината.

Поддршката предвидува шест денари за килограм винско грозје со максимум 18 отсто шеќерни единици предадено во регистрирани винарници од 15 август до 31 октомври 2020 година и наменето за производи од грозје и вински дестилат, два денара за килограм винско грозје предадено кај регистриран откупувач од 15 август до 31 октомври 2020 за производство на вино или за извоз на винско грозје. Поддршка од 30 отсто за транспортни трошоци за извезено вино во шишиња од 1 јануари до 31 октомври 2020, 20 отсто поддршка за транспортни трошоци за извезено наливно вино од 1 јануари до 31 октомври 2020. Поддршка за извезено винско грозје од 15 август до 31 октомври 2020, при што по два денара за килограм за количество до 12 милиони килограми, три денари за количество од 12 до 25 милиони килограми и четири денари за количество над 25 милиони килограми. Секој извозник ќе добие субвенција според количината извезено вино, која ќе се исплаќа скалесто во зависност од количеството на извезено вино.

Максималната поддршка што може еден корисник да ја оствари согласно законот изнесува 18.450.000 денари. Овој износ ја вклучува и финансиската поддршка што корисникот ќе ја добие во согласност со Програмата за финансиска поддршка во земјоделството за 2020 година.

Дополнителни два денари по килограм за произведено и предадено винско грозје лозарите ќе добијат и за одржување на постоечки лозови насади. За оваа мерка лозарите треба да аплицираат до крајот на годината, а парите ќе ги добијат наредната година според рокот за исплати во Програмата за финансиска поддршка во земјоделството за 2020 година. Мерката е наменета за сортите на винско грозје смедеревка, вранец, бургундец црн, станушина, кратошија, жилавка, кавадарка.

На донесување на Законот му претходеше долга собраниска расправа каде пратениците од власта обвинуваа дека пратениците од опозицијата со апсурдни амандмани ја кочат работата на Собранието каде треба да се изгласа помошта за лозарите.

За поранешниот министер за земјоделство од опозицијата Љупчо Димовски исплата на овие два денари редовни субвенции е суституција за сите тие помпезно ветени ковид-19 мерки кои од 6 милиони се сведоа на 5 милиони и 200 илјади евра.

Ова е голем срам и големо понижување за земјоделците, но ние сепак ќе го подржиме овој закон затоа што подобро да добијат нешто отколку ништо, рече Димовски.

Со вкупна субвенциите од четири денари за килограм лозарите годинава ги постигнаа ланските откупни цени 15 денари за „вранец„ и 13 денари за „смедеревка“ и покрај тоа што на почетокот имаше големи проблеми и грозјето не се откупуваше по цена која беше договорена меѓу Владата, лозарите и винарските визби.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.