Асоцијацијата на спортски обложувалници (АСОМ) во врска со измените на Законот за игри на среќа, со кои, меѓу другото, се предвидува дистанцирање на објектите на најмалку 500 метри од образовни институции, посочува дека ваквиот предлог е практично невозможно да се спроведе на терен, бидејќи дистанцирање од една образовна институција едноставно го доближува објектот до друга.

Така, растојанието од 500 метри значи целосно затворање на сите објекти во кои се приредуваат игрите на среќа и гасење на цела една легална стопанска гранка – се наведува во соопштението на АСОМ.

Од Асоцијата оценуваат дека ваквите измени на Законот ќе доведат до затворање на игрите на среќа, ќе има негативни социјални ефекти и огромни загуби за државата.

И натаму тврдиме дека целта на ваквиот предлог не е унапредување на индустријата, заштита на играчите или, пак, зголемување на приходите во буџетот. Ако приредувачите на игрите на среќа стават клуч на своите објекти, речиси 10.000 директно вработени во индустријата остануваат без работа, а државата останува без повеќе од 250 милиони евра кои по сите основи се слеваат во буџетската каса од игрите на среќа. Но, она што е уште поважно, наместо заштита на малолетници, државата свесно ќе отвори пат на нелегално обложување во импровизирани и скриени објекти, каде што практично ќе нема никаква контрола врз играчите – се наведува во соопштението на АСОМ.

Оттаму оценуваат дека законот е целосно контрадикторен, економски неиздржан и правен без соодветни анализи за можните негативни импликации од негово усвојување.

Асоцијацијата посочува дека и покрај нејзините и бројните укажувања на другите приредувачи на игрите на среќа, испратените готови анализи и предлози за унапредување на индустријата и носење квалитетен закон со кој ќе се постигнат низа позитивни промени, предлог измените на Законот за игри на среќа со спорните 500 метри, Министерството за финасии ги достави до Собранието.

Уште еднаш посочуваме дека овој закон за нас е неприфатлив и ние сме подготвени да ги искористиме сите расположиви средства да спречиме тој да се донесе. Државата мора да биде свесна дека ако усвои ваков скандалозен закон, на улица ќе излезат сите 10.000 вработени во индустријата, но и вработени во други стопански гранки кои директно зависат од нашата работа – се додава во соопштението на АСОМ.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.