Цената на бензинот ЕУРОСУПЕР БС-95 од ноќеска на полноќ се намалува за половина денар, а Екстра лесното масло за домаќинство (ЕЛ-1) поскапува за половина денар по литар, додека цените на ЕУРОСУПЕР БС-98 и на ЕУРОДИЗЕЛ (Д-Е V) не се менуваат, одлучи денеска Регулаторната комисија за енергетика (РКЕ). Со одлуката се врши зголемување на малопродажните цени на нафтените деривати во просек за 0,15 отсто.

Новата малопродажна цена на бензинот ЕУРОСУПЕР БС-95 ќе изнесува 60,5 денари за литар, ЕУРОСУПЕР БС-98 и ЕУРОДИЗЕЛ (Д-Е V) и понатаму ќе се продаваат за 63, односно 52,5 денари за литар, а со новото поскапување цената на Екстра лесното масло за домаќинство (ЕЛ-1) ќе се изедначи со ЕУРОДИЗЕЛ (Д-Е V) и ќе чини 52,5 денари за литар.

Со одлуката на РКЕ за 0,156 денари за килограм се зголемува и малопродажната цена на мазутот М-1 НС и ќе изнесува 25,980 денари.

Како причина за промената на малопродажните цени на нафтените деривати од РКЕ ги посочуваат за 0,836 отсто пониската просечна референтна цена на бензинот на светскиот пазар во последните седум дена и за 1,716 отсто повисоката цена на екстра лесното масло, како и за 0,071 отсто повисокиот крус на денарот во однос на доларот.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.