Mинистерот за економија, Крешник Бектеши, вели дека по завршување на изборниот процес министерството за економија почнало со исплата на финансиска поддршка за мерката – ваучери за користење на средства за организиран одмор на работници со ниски приходи.

Досега се исплатени над 23 милиони денари за околу 2.000 ваучери искористени во домашните хотелски капацитети – објави Бектеши на својот Фејсбук профил

Согласно Програмата за домашен туризам за работници со ниски приходи за 2021 година за оваа мерка се предвидени 38 милиони денари за околу 3.500 домаќинства.

Според Јавниот повик, потврда-ваучер за користење на средства за организиран одмор на работници со ниски приходи можеа да добијат сите граѓани чии месечни примања во семејството не го надминуваат нето износот од 30.000 денари и кои аплицираа на Јавниот повик кој беше објавен на 8 јуни 2021 година.

До крајниот рок во Министерството за економија пристигнале над 4.000 апликации. Ваучерите за туризам може да се користат најдоцна до 30 ноември 2021 година во домашните туристички капацитети кои што се пријавија на јавниот повик.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.