Запалени факели летаа кон зградата на словенечкиот парламент вечерва во протестот против ковид-рестрикциите на плоштадот „Република“ во Љубљана. Полицијата одговори со солзавец и водени топови.

Пред протестот, организаторите повикаа на мирен собир, но се случи инцидент кога еден од учесниците фрли шише врз еден од полицајците кои го обезбедуваа собирот. Тогаш демонстрантите запалија факели и почнаа да ги фрлаат кон собраниската зграда. Според Н1- Словенија, на собирот се и навивачките групи на двата најголеми фудбалски клуба во земјата.

Кога толпата се приближи кон собранието и почна да фрла факели, полицијата одговори со солзавец и ја растури групата. Многу демонстранти побегнаа.

Денеска во Словенија стапија во сила заострените мерки против ковид кои предизвикаа големо незадоволство кај невакцинираните. Најголемото незадоволство е кај возачите кои ако немаат ковид-пропусница не можат на наточат гориво во својот автомобил. Демонстрантите упатија две барања: промена на мерките за сузбивање на вирусот во препораки и распишување предвремени избори.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.