За ратификацијата на протоколот за членство во НАТО, Нова демократија ќе го стори истото што го направи и при процесот за ратификација на Договорот, бидејќи сметаме дека е лош договор и не е во корист на националните интереси, рече Мариа Спираки, портпаролката на најголемата грчката опозициска партија на денешниот брифинг со новинарите, јави дописничката на МИА од Атина.

Спираки вели дека сега, „Ципрас брза да се заборави дека веќе се прекршува договорот, брза да се заборави дека отстапи македонски јазик и идентитет за соседите, а Заев слави, заборавајќи го првиот дел од сложеното име на неговата земја“.

– Нова демократија се обврзува строго да го контролира спроведувањето на овој лош договор. Нова демократија се обврзува дека ќе се бори за да ги ограничи последиците врз економијата и бизнисите во Северна Грција. Затоа, подготвува и набргу ќе соопшти план за поддршка и продуктивна реконструкција за нашата Македонија. Нова демократија како идна влада, целосно го задржува нејзиното право да го блокира текот на нашите соседи кон ЕУ, доколку смета дека е засегнат националниот интерес, рече Спираки.

Порптаролката на Нова демократија вели дека владата во обид да избега од Преспа од фиока ја извадила можноста за зголемување на минималната плата, нешто што можело да се направи уште во септември минатата година.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.