Претседателката на Косово, Вјоса Османи, на барање на Министерството за надворешни работи и дијаспора, го потпиша указот за повлекување на амбасадорот на таа земја во Република  Македонија, Ѓерѓ Дедај и на 11 други дипломатски претставници за кои е заклучено дека биле „политички именувани“ од претходните власти, јави дописникот на МИА од Приштина.

Шефицата на косовската дипломатија, Доника Грвала-Шварц на денешната прес-конференција изјави дека разрешувањето на 12-те амбасадори претставува само еден чекор во правец на реформите кои претстојат во дипломатската служба.

– Ослободувањето од должноста и повлекувањето на политички именуваните амбасадори е извршено во духот на усвоената владина програма, со која се предвидува реформирање на дипломатската служба. Во наредните недели ќе бидат избрани новите амбасадори и ќе продолжи реформата, која е задоцнета, но се изготвува сериозно, изјави министерката Грвала-Шварц, заблагодарувајќи им се на повлечените дипломати за досегашната служба.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.