Грчкиот премиер Кирјакос Мицотакис, во интервјуто за Си-Ен-Ен, во кое говореше за неодамнешните пожари што ја зафатија Грција, изјави дека бројот 112 за итни случаи, работел исклучително добро и им овозможил на властите на соодветен начин да евакуираат области со десетици илјади луѓе.

Мицотакис објасни дека по катастрофалниот пожар во Мати во 2018 година, кога над 100 лица го загубија животот, една од неговите лични заложби било и воспоставување систем што ќе го користи меѓународниот број 112 за итни случаи за предупредување на граѓаните и давање јасни упатства за евакуација.

Грчкиот премиер во интервјуто повтори дека Грција, десет дена се соочуваше со екстремно високи температури и требаше да се справи со речиси 600 пожари, од кои неколку беа особено големи.

Во еден момент се најдовме соочени со четири „мегапожари“ во исто време. Сторивме сè што можевме, евакуиравме области со десетици илјади луѓе. За среќа успеавме да заштитиме човечки животи, имавме само една загуба. Па така, цивилната заштита во овој поглед направи одлична работа. Но, секако соочени сме со голема еколошка катастрофа, значителен број шуми се уништени. А се плашам дека ова ќе биде реалноста со која отсега ќе се соочуваат регионите како што е Медитеранот. Не станува збор само грчки проблем – изјави Мицотакис.

Во интервјуто, Мицотакис говори и за климатските промени и владината политика за прекинување на употребата на јаглен и затворање на електраните со лигнит, истакнувајќи дека Грција е во првите редови за справување со климатската криза.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.