На грчкиот остров Евија се спроведува потрага по исчезнат маж во невремето „Балос“, кое веќе втор ден создава проблеми во повеќе делови во Грција, а во Атина во сила се превентивни мерки, затворени јавни служби, училишта и градинки.
Во село во јужниот дел на островот Евија, од доцна синоќа трае потрагата по исчезнат 69-годишен маж, а вклучени се 20 пожарникари со седум возила, тим од специјалната единица за справување со катастрофи и еден хеликоптер.
Денеска проблеми поради обилниот дожд има на Халкидики, Евија, Крф, а во Солун автобус пропадна на улица, откако се отворила дупка на асфалтот, но немало повреден некој од патниците.
Во Атина денеска нема проблеми, со оглед на тоа дека утрово и претпладнево не врне, но се санираат штетите од вчерашното невреме.
Автобус на јавниот превоз, кој вчера се заглави во подвозник во Атина, веќе 24 часа е на истото место, со оглед на тоа дека насобраната вода достигнува до метар и половина.
За помалку од 24 часа, односно во периодот од 10 часот вчера до 7 часот утрово, Противпожарната служба на Грција примила 1.424 повици за помош, од кои 779 во областа Атика, поширокиот дел на Атина.
Министерот за климатска криза и цивилна заштита на Грција, Христос Стилијанидис синоќа објави превентивни мерки поради невремето.
Во периодот од еден часот по полноќ до осум часот утрово два булевара во Атина беа затворени, со забрана за сообраќај на автомобили и јавен превоз, а денеска затворени се државните служби во Атика, додека, пак, грчката Влада му препорача на приватниот сектор да работи од дома.
Основните и средните училишта, како и градинките, денеска се затворени во областа Атика, поширокиот дел на Атина, на Халкидики, како и на островите Евија, Самос, Крф и Икарија.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
Comments are closed for this post.