Софиската фирма „Блацион”, чиј управител е македонскиот граѓанин Блаже Игнатовски, увезла отпад од Италија кој пристигнал во бугарското пристаниште Варна, објави бугарската БТВ Новините.

Обвинителството во Варна почнало истрага за товарот по информациите за нарушување на редот за прекуграничен пренос на отпад, а во неа се вклучени Министерството за внатрешни работи, Обвинителството, Царината и екоинспекцијата во Варна. Засега, како што јавува телевизијата, нема приведени лица.

Испраќачот на товарот е фирмата „Дентиче Пантелоне” од италијанскиот град Авелино, а увозник е софиската фирма „Блацион” чиј управител е македонскиот граѓанин Блаже Игнатовски. Според Регистерот на компании во Бугарија, освен Игнатовски, содружници во фирмата се македонскиот државјанин Горан Ангелов, инаку директор на Дрисла и италијанските државјани Енцо Боче и Винченцо Трасари.

Товарот, 25 контејнери со бали со отпад, со брод од италијанското пристаниште Салерно пристигнал во пристаништето Варна-Запад на 9 октомври и според законот, во рок од 90 дена фирмата увозник треба да ја насочи пратката за царинење и достава или за реекспорт, но тоа не се случило, па реагирала Царината.

Царината утврдила дека истекол рокот и според процедурата, до увозникот на робата испратиле писмо за регулирање на состојбата, но, колку што сум информирана, одговор не добиле – вели Владислава Панајотова, раководителка на Регионалното обвинителство-Варна.

Надлежната обвинителка Невена Илиева објаснува дека отпадот што стигнал во Варна се разликува од декларацијата во царинската документација и наместо пријавените пластични отпадоци и каучук, во балите имало различни други текстилни, стаклени и дрвени отпадоци.

Компанијата досега не била предмет на полициски проверки, но на нејзината адреса во Софија, наведена во Трговскиот регистар немало претставници на „Блацион”. На новинарите кои се обиделе да стапат во контакт со нив на наведена адреса, на домофон им било одговорено дека таму никогаш немало таква фирма.

Инаку, како дејност на фирмата во Регистарот е наведено собирање, третман и трговија со отпад од домаќинствата, а сега истражните органи проверуваат дали фирмата „Блацион” имала лиценца за преработка на отпад и дали содржината на 25-те контејнери е во согласност со дозволата.

Друг прекршок во врска со овој товар е што отпадот не е вакумиран и балиран, како што налага законот за прекуграничен пренос на отпад. Но, од Министерството за животна средина не коментирале што откриле екоинспекциите.

Инаку, деновиве во Бугарија се откриени повеќе случаи со увоз на опасен и сомнителен отпад, а во пристаништето во Бургас се вршат проверки на над 20 контејнери со отпад од Италија, наменети за фирма во Плевен.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.