Граѓани на Црна Гора се вакцинираат против коронавирусот во Србија, каде масовната имунизација на населението започна кон средината на јануари. Цената на првата од двете дози на кинеската вакцина „Синофарм“ црногорските граѓани во Србија ги чинела околу 70 евра. Неколку здравствени работници, но и политичари од Црна Гора биле вакцинирани во изминатите неколку дена во Белград и платиле 70 евра за тоа.

Министерот за здравство во Србија, Златибор Лончар, минатиот викенд рече дека Србија во моментов има на располагање повеќе од половина милион вакцини против коронавирус и дека „ќе се користат поголеми бројки“. Планот е оваа година да се вакцинираат 20% од населението. До почетокот на оваа недела повеќе од 700.000 граѓани се пријавиле за вакцината. Вакцините „Фајзер/Бионтек“, „Спутник V“ и „Синофарм“ се достапни во Србија, а се очекува доаѓање на уште две – „Астра Зенека“ и „Модерна“.

Според планот за вакцинација во Србија, до три проценти од населението е во првата фаза на вакцинирање, односно вработени во здравствени установи, домови за стари лица, постари од 65. години во домови за стари лица, сите лица постари од 75 години и сите лица на возраст од 65 до 74 години со фактори на ризик…

Во втората фаза се лица на возраст од 65 до 74 години кои не се вклучени во првата група, помлади од 65 години со хронични болести, вработени во витални служби, образовни институции, судство, армија, комунални услуги.

Вакцинацијата во третата фаза треба да опфати од 21 до 50 проценти од населението, меѓу кои има и лица со загрозен социјален статус.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.