Српската владина Канцеларија за Косово и Метохија соопшти дека се неточни наводите на претставниците на Приштина дека Белград не ѝ дозволил посета на косовската шефица на дипломатијата, Доника Грвала на Бујановац и Прешево, јави дописникот на МИА од Белград.

Во соопштението се потсетува дека, според договорот за официјални посети, секоја посета меѓу функционери на Белград и Приштина се смета за одобрена доколку експлицитно не е забранета со допис, со што барањето на Доника Грвала е третирано позитивно.

Се додава дека „офицерот за врска кој го претставува Белград денеска и усно му пренел на приштинскиот офицер за врски во Белград дека е одобрена посетата на Грвала во централна Србија и дека може да ги посети споменатите општини согласно важечкиот договор и без статусни знаци“.

За тоа, како што се посочува, сведочи и мејлот со кој приштинскиот офицер за врска денеска му се заблагодарува на белградскиот офицер за врска по повод одобрувањето на посетата.

-Белград е тој кој доследно ги почитува договорите и се залага за нормализација на односите и неточните наводи од Приштина тоа не може да го поништат, се наведува во соопштението.



Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.